Bele ti ani 70 dl ultimo centené ova i aministradëures di Chemuns de Gherdëina y Ciastel per la frazions ladines, udù l bujën meter adum n gremium, che se da ju cun servijes y lëures de nteres sëuracumenel. N gran cruze fova ntlëuta l tenì nët dl’eghes y dl paesaje. Do defrënta cunsultazions danter i Chemuns nteressei, an pona purtà dant chësc proiet al’aministrazion provinziela. Cun delibra dla Jonta provinziela n. 3937 dl 01.10.1973, univa costituì l Cunsorz per servijes publics danter i Chemuns de Urtijëi, S.Cristina, Sëlva y Ciastel. Chësc cunsorz ova la ncëria de frabiché o cumpré frabicac de nteres sëuracumenel y de mené servijes de nteres sëuracumenel;

Cun l ann 1974 ova l Cunsorz, nscila numinà, scumencià si atività. Via per i ani iel unì frabica l mplant per l smaltimënt dl refudam, la desćëria di resć dl refudam, la canalisazion de val, la sarenea, l zënter de recycling y la cësa de paussa a Urtijëi. Tla cësa dla vedla cësa de paussa ova nscì abinà lerch l servisc soziel Gherdëina. La cësa "Locia" ie unida cumpreda y frabicheda ora. Per manejé y aministré i mplanc ecologics a Pontives ovun metù su la sozietà Zënter scunanza ambient Gherdëina-Ciastel s.r.l.. Chësta pudova nstës tò su l personal che jiva de bujën. A chësta sozietà fajova pert i chemuns cunsorziei, l Cunsorz y privac.

L azienda cunsorziela ncuei

Na desposizion regionela udova dant la licuidazion de duc i cunsorc de chemuns. Davia che i chemuns cunsorziei ulova pur mpo jì inant y ulova realisé l proiet neuf dla sënta per la Creusc Blancia y la Creusc Cuecena, ie tl ann 2010 l cunsorz unì trasfurmà te n cunsorz-azienda cun l inuem: Azienda cunsorziela Gherdëina - Ciastel. Te chësta azienda cunsorziela ne possa i cumëmbri dl Cunsëi d'aministrazion nia vester tl medemo mumënt cunselieres di chemuns. I ambolc dl mumënt di cater chemuns fej ora, coche Nduneda cunsorziela, l program y si finanziamënt. L Cunsëi d'aministrazion ie dant al dut respunsabl de atué la dezijions tëutes dala Nduneda cunsorziela.

Ntant an pudù realisé nce l Zënter de aiut Gherdëina a S. Cristina. L' Azienda cunsorziela ne fej degun servijes diretamënter. La sozietà Zënter scunanza ambient Gherdëina-Ciastel s.r.l. ie unida licuideda. Dal 1.1.2013 ie la Eco Center s.p.a. che manejea la sarenea y la canalisazion de val. La Cumunità raion Salten - Sciliar ie respunsabla de mené la cësa de paussa „San Durich“, l servisc soziel Gherdëina y la cësa "Locia".

L' Azienda cunsorziela se à cruzià de ressané la desćëria dl refudam.

Aministrazion trasparënta